Prezadas familias:
Convidámosvos a participar nos proxectos interxeneracionais que imos poñer en marcha este curso no colexio. Gustaríanos contar, especialmente, coas avoas, avós e con todas aquelas persoas da comunidade que de seguro teñen tanto que ensinar e compartir coas nosas crianzas.
Sabemos que gardades moita sabedoría, experiencias e historias valiosas: coñecementos sobre a terra, as plantas, a cociña tradicional, os xogos e cancións de antes, os oficios, os contos e tantas outras cousas que forman parte da nosa cultura e identidade.
Estas propostas naceron da Comisión Mixta da Contorna, creada despois da primeira Asemblea de Centro, onde profesorado e familias unimos forzas para abrir a escola á comunidade e aprender tamén da xente que forma parte dela.
Neste trimestre poñeremos en marcha dous proxectos:
“Arredor da horta”
Para traballar e aprender na horta escolar, coñecer as plantas, sementar, recoller e facer obradoiros con produtos naturais…
“Contando e debullando”
Un espazo para compartir contos, lembranzas, historias, cancións, saberes da vida…
A vosa participación é o que fai posible que a nosa escola sexa un espazo aberto, vivo e cheo de aprendizaxes compartidas entre xeracións.
A continuación tendes un pequeno cuestionario para que indiquedes se queredes participar e de que maneira (contando historias, axudando na horta, acompañando actividades ou simplemente compartindo un anaco do voso tempo).
Grazas pola vosa colaboración. Seguimos facendo comunidade 💚
Unha aperta
Formulario para apuntarse: